Tragjedi në Greqi – Vdes 14-vjeçarja shqiptare pas rrëzimit nga një urë në Katerini
Një ngjarje e rëndë ka tronditur komunitetin shqiptar dhe qytetin e Katerinit në Greqi, ku një vajzë shqiptare 14 vjeçe ka humbur jetën pas një incidenti tragjik.
Sipas mediave greke, e mitura është rrëzuar nga një urë rreth 10 metra e lartë, duke pësuar dëmtime të rënda trupore. Fillimisht, ajo është transportuar me urgjencë në spitalin e Katerinit, por për shkak të gjendjes kritike, mjekët kanë vendosur ta dërgojnë në spitalin “G. Gennimatas” në Selanik, e më pas në spitalin “Ippokrateio”.
Pavarësisht përpjekjeve të shumta të ekipeve mjekësore për ta shpëtuar, vajza ndërroi jetë mbrëmjen e së hënës, duke lënë pas dhimbje të thellë te familjarët dhe komuniteti shqiptar në Greqi.
Rrethanat e sakta të ngjarjes ende nuk janë sqaruar plotësisht. Autoritetet greke kanë nisur hetimet dhe deri tani kanë përjashtuar pistën e një akti kriminal, duke fokusuar hetimin në rrethanat aksidentale të rrëzimit.
Ngjarja ka shkaktuar reagime të shumta dhe mesazhe ngushëllimi në rrjetet sociale, ndërsa familja e viktimës po përballet me një tragjedi të thellë