Sarandë – Parkoi mbi trotuar duke bllokuar qarkullimin, procedohet penalisht dhe gjobitet me 20 000 lekë 31-vjeçari nga Kamza
Strukturat e Komisariatit të Policisë Sarandë kanë vijuar me kontrollet intensive në terren, me qëllim evidentimin dhe ndëshkimin e rasteve të parkimeve të parregullta që cenojnë rendin dhe sigurinë publike në qytet.
Më datë 26 korrik 2025, rreth orës 23:30, në rrugën “Vangjel Pandi” të Sarandës, efektivët e policisë konstatuan një automjet të parkuar mbi trotuar, duke penguar rëndë qarkullimin e automjeteve të tjera dhe duke bllokuar rrugëkalimin për këmbësorët.
Pas verifikimeve, drejtuesi i mjetit rezultoi të ishte shtetasi E. D., 31 vjeç, banues në Kamëz. Ndaj tij, specialistët për Hetimin e Krimeve në Komisariatin e Policisë Sarandë referuan materialet në Prokurori dhe nisën procedimin penal për veprën “Pengimi i qarkullimit të mjeteve të transportit”, parashikuar nga neni 293 i Kodit Penal.
Përveç ndjekjes penale, shërbimet e Qarkullimit Rrugor Sarandë vendosën gjithashtu një masë administrative prej 20 000 lekësh, bazuar në nenin 159, pika 2/4 të Kodit Rrugor të Republikës së Shqipërisë.
Drejtoria Vendore e Policisë Vlorë apelon për respektimin e rregullave të qarkullimit rrugor, duke theksuar se çdo parkim i gabuar, veçanërisht në trotuare apo rrugëkalime, përbën rrezik për sigurinë publike dhe do të ndëshkohet menjëherë, si me gjoba, ashtu edhe me procedim penal në rastet e përsëritura apo të rënda.
Policia fton qytetarët të denoncojnë çdo rast të shkeljeve të tilla në numrin 112, duke garantuar reagim të shpejtë dhe në përputhje me ligjin.
