Kreu i SPAK, Altin Dumani, ka dërguar një mesazh të fortë në drejtim të qeverisë, duke kërkuar mosndërhyrje në pavarësinë institucionale të Prokurorisë së Posaçme, përmes rekomandimeve të paqarta apo ndërhyrjeve të tërthorta.
Deklarata u bë gjatë një tryeze të organizuar për vlerësimin e arkitekturës institucionale të SPAK, me fokus tek performanca, integriteti dhe garancitë për pavarësinë e prokurorëve të posaçëm.
Në fjalën e tij, Dumani theksoi:
“Në funksion të pavarësisë së brendshme, si drejtues i SPAK, kam deleguar thuajse të gjitha komunikimet që prokurorët bëjnë me institucionet e tjera. E ndërmora këtë hap duke iu garantuar këtë pavarësi, pra që prokurorët të komunikojnë në mënyrë të pavarur me institucionet, pa u përfshirë si drejtues i SPAK, përjashtuar në disa raste hetimi.”
Ai shtoi se çdo përpjekje për të ndikuar në punën e SPAK, qoftë edhe përmes “rekomandimeve” pa bazë të qartë ligjore, cenon ndarjen e pushteteve dhe funksionimin e drejtësisë së pavarur.
Ndër të tjera, Dumani ngriti edhe shqetësimin për mungesën e qartësisë ligjore mbi statusin e prokurorëve të posaçëm pas përfundimit të mandatit të tyre.
“Në raportimet periodike në Kuvend dhe KLP, kemi kërkuar zgjidhje për këtë boshllëk ligjor. Prokurorët e posaçëm meritojnë një përgjigje të qartë, cilado qoftë ajo,” – tha ai.
Këto deklarata vijnë në një klimë tensioni mes institucioneve të drejtësisë dhe ekzekutivit, ku përplasjet mbi kufijtë e kompetencave dhe ndërhyrjet politike janë bërë më të dukshme, veçanërisht me afrimin e proceseve sensitive gjyqësore ndaj figurave të njohura politike dhe ekonomike.