Presidenti amerikan Donald Trump zhvilloi një telefonatë mbi një orë me Presidentin rus Vladimir Putin, ku diskutuan për konfliktin në Ukrainë dhe situatën në Lindjen e Mesme, me fokus të veçantë tek çështja iraniane.
Biseda mes dy liderëve vjen në një moment kritik për përpjekjet e Trump për të ndërmjetësuar një zgjidhje mes Moskës dhe Kievit, ndërsa SHBA ka pezulluar së fundmi dërgesat e armëve për ushtrinë ukrainase – një zhvillim që ka ngritur shqetësime ndërkombëtare.
Sipas këshilltarit të politikës së jashtme të Kremlinit, Yuri Ushakov, tema e dërgesave të armëve nuk u diskutua gjatë telefonatës. Megjithatë, ai konfirmoi se Trump dhe Putin patën një “diskutim të detajuar” për Iranin dhe zhvillimet e fundit në Lindjen e Mesme.
Detaje të tjera mbi përmbajtjen dhe rezultatet konkrete të bisedës nuk janë bërë publike deri më tani.