Fier – Riparimi i njërit prej segmenteve të urës kryesore mbi lumin Gjanica, në hyrje të qendrës së Fierit, ka sjellë vështirësi të ndjeshme në qarkullimin rrugor, veçanërisht gjatë këtyre ditëve të sezonit turistik.
Aktualisht, qarkullimi i automjeteve po kryhet vetëm në njërin segment të urës, i cili është ndarë në dy korsi të përkohshme, duke e kthyer atë në një rrugë me trafik të alternuar. Segmenti tjetër, ai dalës nga qyteti, është bllokuar për shkak të punimeve intensive për rikonstruksion.
Autoritetet kanë bërë thirrje për drejtuesit e mjeteve që të shmangin sa të jetë e mundur këtë aks rrugor dhe të përdorin rrugë alternative, për të evituar bllokimin dhe vonesat në lëvizje.
Pritet që punimet në këtë segment të përfundojnë brenda disa javëve, ndërsa situata e rënduar e trafikut po vështirëson ndjeshëm hyrje-daljet nga qyteti, në një periudhë ku fluksi i automjeteve rritet ndjeshëm për shkak të turizmit dhe lëvizjeve sezonale
