Kryetari i Partisë “Mundësia”, Agron Shehaj, ka deklaruar se po ndjek nga afër procesin e rinumërimit të votave në qarkun e Tiranës, ku sipas tij po tentohet të cenohet mandati i kësaj force politike.
Në një intervistë për Euronews Albania, Shehaj theksoi se deri tani janë hapur 25 kuti dhe ndryshimet në rezultat janë minimale, por shqetësimi i tij lidhet me vendimet e Komisionit të Ankimimeve dhe Sanksioneve (KAS).
Sipas Shehajt, KAS po rivlerëson si të vlefshme disa vota që në numërimin e parë ishin shpallur të pavlefshme, duke i shtuar ato Partisë Demokratike dhe Partisë Socialiste. “Të gjitha votat e pavlefshme që janë shtuar PS-së dhe PD-së kanë pasur problem, por KAS po vendos t’i quajë të vlefshme,” u shpreh ai.
Shehaj akuzoi se KAS është i përbërë nga anëtarë të propozuar nga partitë e mëdha dhe po merr vendime në favor të tyre. “Votat tona janë identike. Janë shtuar 4 vota për PD-në vetëm në këto 25 kuti. Nëse ka tentativa për të rrëmbyer mandatin e partisë ‘Mundësia’, do ta denoncojmë,” tha ai.
Shehaj theksoi se partia e tij ka vëzhgues në çdo hap të procesit dhe do të mbrojë çdo votë të qytetarëve që i besuan.
