Një çështje e pazakontë gjyqësore, ku një burrë akuzonte bashkëshorten për dhunë të përsëritur, është pushuar për shkak të amnistisë.
Ngjarja daton tetë vjet më parë, kur burri me inicialet L.G. denoncoi bashkëshorten M.G. në polici, duke pretenduar se ajo e kishte dhunuar në të paktën katër raste. Pasi çështja kaloi në disa shkallë gjyqësore, në Apel, burri deklaroi se gruaja ishte e pafajshme, duke shtuar se ai kishte qenë i dehur në momentin e incidentit dhe se marrëdhënia e tyre ishte normalizuar.
Megjithatë, tërheqja e tij nuk ishte arsyeja e pushimit të çështjes. Dosja u mbyll për shkak të ligjit të amnistisë, nga i cili përfitoi e akuzuara.
Historia e dhunës në familje
Sipas dosjes hetimore, çifti ishte i martuar prej tre vitesh kur L.G. bëri kallëzimin në vitin 2017. Ai kishte marrë edhe më parë një urdhër mbrojtjeje ndaj gruas, e cila ishte dënuar për dhunë në familje edhe në vitin 2016.
Incidenti më i rëndë ndodhi më 23 maj 2017, kur M.G. e goditi burrin me grushte në fytyrë, duke i shkaktuar fraktura në sy dhe në nofull. Në atë moment, ai raportoi se ajo hodhi edhe sende shtëpiake nga dritarja, në një shpërthim dhune.
Në gjykatën e Tiranës, gjyqtari Gerd Hoxha dënoi M.G. për dhunë në familje, pasi dëgjoi edhe dëshmitë e tre fëmijëve të burrit nga martesa e parë, të cilët e përshkruan njerkën si agresive ndaj babait të tyre. Për shkak të precedentëve të mëparshëm, ajo u dënua me nëntë muaj burg, por pavarësisht dënimit, çifti vazhdoi bashkëjetesën.
Në Apel, ku çështja u rishqyrtua, burri u tërhoq nga akuzat, por kjo nuk pati ndikim në proces. Amnistia e miratuar së fundmi nga autoritetet pezulloi automatikisht dënimin, duke i dhënë fund kësaj historie të gjatë gjyqësore.
Pavarësisht vendimit të gjykatës, mbetet e paqartë nëse çifti do të vazhdojë të jetojë së bashku apo nëse dhuna do të përsëritet.
