Për çdo 1 lek të fituar nga eksporti, shpenzohen mbi 12 lekë për import
Importet e grupit “Produkte bulmetore, vezët dhe mjalti” kanë shënuar një rritje të fortë dhe të qëndrueshme gjatë dy dekadave të fundit, si në peshë ashtu edhe në vlerë. Të dhënat për periudhën 2005–2025 tregojnë një prirje që nuk mund të shpjegohet vetëm me rritjen e konsumit apo përmirësimin e standardeve, por lidhet drejtpërdrejt me dobësimin e prodhimit vendas të qumështit dhe nënprodukteve të tij.
Sipas analizave të mëparshme të Scan Intel, në vitin 2024 në Shqipëri u grumbulluan rreth 95 mijë tonë qumësht, një sasi 6.6% më e ulët krahasuar me një vit më parë – sinjal i qartë i tkurrjes së bazës prodhuese vendase.
Importet janë trefishuar në peshë dhe mbi gjashtëfishuar në vlerë
- Në vitin 2005, importet e bulmetit ishin rreth 10.8 mijë tonë
- Në vitin 2025, ato arrijnë 36.8 mijë tonë
Mbi 3.3 herë rritje në 20 vite
Në aspektin e vlerës:
- Nga 1.25 miliardë lekë në 2005
- Në 7.74 miliardë lekë në 2025
Mbi 6 herë rritje
Vetëm krahasuar me vitin 2024, importet e bulmetit janë rritur me rreth 14% në vlerë.
Eksportet mbulojnë vetëm 8% të importeve
Në vitin 2025:
- Eksportet e produkteve bulmetore, vezëve dhe mjaltit: 629 milionë lekë
- Importet: 7.7 miliardë lekë
Kjo do të thotë se eksportet mbulojnë vetëm rreth 8% të importeve.
Me fjalë të tjera, për çdo 1 lek të fituar nga eksporti, Shqipëria shpenzon mbi 12 lekë për import.
Si rezultat, krijohet një deficit tregtar rreth 7.1 miliardë lekë vetëm për këtë grup produktesh – një barrë e rëndë për bilancin tregtar dhe për sektorin bujqësor vendas.
Nga cilat vende furnizohet Shqipëria?
Importet e produkteve bulmetore janë të përqendruara kryesisht në disa vende europiane:
Italia – 33.4% (furnizuesi kryesor)
Gjermania – 12.2%
Greqia – 9.3%
Këto tre vende së bashku mbulojnë më shumë se gjysmën e importeve totale.
Ndër furnizuesit e tjerë kryesorë janë:
Serbia – 8.8%
Holanda – 4.6%
Hungaria – 4.0%
Përfundim
Rritja e shpejtë e importeve të bulmetit, ndërkohë që prodhimi vendas po tkurret, po e bën Shqipërinë gjithnjë e më të varur nga tregjet e huaja. Pa politika mbështetëse për blegtorinë dhe përpunimin vendas, deficiti tregtar në këtë sektor pritet të thellohet edhe më tej.
