Situata meteorologjike ka krijuar vështirësi në qarkullimin e automjeteve në Rrugën e Kombit gjatë ditëve të fundit. Prania e mjegullës së dendur ka ulur ndjeshëm shikueshmërinë, duke u bërë burim rreziku për aksidente.
Problematika shfaqet më e theksuar në segmentin nga Tuneli i Kalimashit deri në Kolsh, ku fushëpamja është kufizuar deri në rreth 10 metra.
Masat e Policisë dhe Apeli për Drejtuesit
Përballë kësaj situate, patrullat e Policisë Rrugore që monitorojnë këtë aks kombëtar kanë intensifikuar prezencën në terren. Efektivët po ndalojnë drejtuesit e mjeteve jo për t’i ndëshkuar, por për t’i këshilluar mbi rrezikshmërinë e kushteve atmosferike.
Policia Rrugore apelon për të gjithë drejtuesit që udhëtojnë në këtë aks:
-
Të ulin menjëherë shpejtësinë e lëvizjes;
-
Të ruajnë një distancë sigurie më të madhe se zakonisht nga mjeti pararendës;
-
Të mbajnë të ndezura dritat e mjegullës dhe ato të kryqëzimit gjatë gjithë kohës.
