Ekuipazhi i ARTEMIS II pas kthimit historik nga udhetimi ne HENE hipin ne anijen amerikane USS JOHN P.MURTHA Astronautët në rikuperim pas kthimit në Tokë, nis programi 45-ditor i rehabilitimit
Pas kthimit në Tokë, astronautët i nënshtrohen menjëherë një sërë procedurash të rrepta mjekësore dhe sigurie, për të përballuar efektet që sjell qëndrimi në mikrogravitet.
Menjëherë pas uljes, ekipet e rikuperimit sigurojnë kapsulën dhe më pas profesionistët shëndetësorë kryejnë kontrollet e para për gjendjen e ekuipazhit. Astronautët nxirren nga anija shpesh me ndihmë, pasi sistemi i tyre i ekuilibrit është i çrregulluar nga mungesa e gravitetit.
Më pas, ata transportohen drejt qendrave të specializuara, ku i nënshtrohen ekzaminimeve të detajuara dhe nisin një program të strukturuar rikuperimi që zgjat rreth 45 ditë.
Gjatë javëve të para, fokusi kryesor është rehabilitimi fizik për të rikthyer forcën muskulore dhe densitetin e kockave, si dhe testimet për problemet e shikimit të lidhura me qëndrimin në hapësirë.
Ekspertët theksojnë se astronautët përballen shpesh me marramendje, dhimbje fizike dhe vështirësi në qëndrimin në këmbë, për shkak të ndryshimeve në sistemin e qarkullimit të gjakut dhe ekuilibrit.
Pas përfundimit të programit fillestar, rikuperimi vazhdon me ushtrime fizike dhe mbështetje psikologjike, ndërsa astronautët ndajnë përvojat e tyre për të ndihmuar në përmirësimin e misioneve të ardhshme hapësinore.
Sipas specialistëve, shumica e astronautëve arrijnë të rikthehen në gjendjen e tyre normale fizike brenda një muaji nga kthimi në Tokë.
