Kreu i Partisë Demokratike, Sali Berisha, nga tryeza e opozitës ka lëshuar akuza të forta ndaj qeverisë për menaxhimin e situatës së përmbytjeve, duke bërë thirrje për reagime fizike ndaj kabinetit qeveritar.
Fjalimi i tij u përqendrua në tre shtylla kryesore: akuzat për sabotim të infrastrukturës kulluese, përdorimi politik i drejtësisë dhe legjitimiteti i zgjedhjeve.
“Provokimi” me Ballukun dhe Thirrja për Revoltë
Berisha e cilësoi vizitën e Zëvendëskryeministres Belinda Balluku në zonën e përmbytur të Vlorës si një fyerje për banorët e dëmtuar.
“Në një akt provokativ ndër më të ulëtit, e kishte dërguar dje Lubi Ballukun tek Ura e Mifolit. Iu bëj thirrje qytetarëve, kudo që të shihni ministra, i gjuani me vezë ose domate. Këta janë shkaktarë kryesorë të fatkeqësive tuaja,” deklaroi Berisha.
Akuzat për Hidrovoret: “Janë vjedhur motorët”
Lideri demokrat hodhi poshtë pretendimet e qeverisë se fajin e ka natyra. Ai paraqiti të dhëna specifike për dështimin e infrastrukturës në Durrës:
-
Hidrovori i Hamallës: Sipas Berishës, pompat dhe motorët janë vjedhur dhe nuk janë në funksion.
-
Zgjidhja improvizuar: Ai pretendoi se janë vendosur pompa të vogla nafte që nuk përballojnë fluksin.
-
Arsyeja e mos-shpalljes së Emergjencës: Berisha argumentoi se Rama refuzon të shpallë Gjendjen e Jashtëzakonshme për të mos u detyruar ligjërisht të përdorë fondin rezervë për dëmshpërblimin e qytetarëve.
Imuniteti dhe “Grushti i Shtetit”
Berisha bëri një krahasim mes qeverisjes së tij dhe asaj aktuale lidhur me drejtësinë. Ai përmendi rastet e Fatmir Mediut, Lulzim Bashës dhe Ilir Metës, të cilët sipas tij dorëzuan imunitetin ose dhanë dorëheqjen për t’u hetuar, ndërsa akuzoi Ramën se po përdor segmente të drejtësisë për të bllokuar hetimet ndaj njerëzve të tij.
