Në një kohë kur prindërit përballen me sfidën e mbajtjes së fëmijëve të angazhuar me aktivitete argëtuese, edukative dhe të sigurta, ekspertët e zhvillimit fëmijëror i bëjnë thirrje për më shumë kujdes ndaj llojeve të lodrave që përdoren në shtëpi.
Psikologia zhvillimore Dr. Aliza Pressman ka dhënë një paralajmërim të qartë për prindërit dhe gjyshërit: jo çdo lodër ndihmon në zhvillimin mendor dhe emocional të fëmijëve. Përkundrazi, disa prej tyre mund të ndikojnë negativisht në aftësitë motorike, në zhvillimin e trurit dhe në rregullimin emocional të të vegjëlve.
Gjatë një komunikimi me ndjekësit e saj, Dr. Pressman theksoi rëndësinë e përzgjedhjes me kujdes të lodrave. Ajo kritikoi ashpër lodrat që luajnë vetë, që kanë shumë drita, zëra të lartë dhe që nuk kërkojnë ndërveprim nga vetë fëmija. “Këto lodra pasive e kthejnë fëmijën në spektator, jo pjesëmarrës. Zhvillimi ndodh përmes ndërveprimit aktiv, eksplorimit dhe imagjinatës”, tha ajo.
Ndër lodrat që ajo nuk rekomandon, janë:
- Lodrat që “flasin vetë” ose lëshojnë zëra të komanduar elektronikisht
- Pajisjet shumëngjyrëshe me drita që shpërqendrojnë
- Tabletat dhe mjetet digjitale që zëvendësojnë lojën fizike
Në vend të tyre, Dr. Pressman sugjeron lodra të thjeshta si:
- Blloqet ndërtimi (lego, kuba druri)
- Lodra që stimulojnë imagjinatën (kukulla, mjete imituese të profesionit)
- Bojërat, ngjyrat, plastelinat dhe materialet për vizatim
“Një lodër e mirë nuk duhet të bëjë shumë vetë – ajo duhet t’i lejojë fëmijës të bëjë shumë”, përfundon psikologia, duke nxitur prindërit të reflektojnë për zgjedhjet që bëjnë për të vegjlit. Sipas saj, nuk është sasia e lodrave që ka rëndësi, por cilësia dhe aftësia për të nxitur mendimin krijues dhe ndërveprimin.
Ky paralajmërim vjen në një kohë kur lodrat teknologjike po zënë gjithnjë e më shumë hapësirë në treg, ndërsa ekspertët shprehin shqetësimin për pasojat afatgjata që mund të kenë tek gjeneratat në rritje.