Një moment i veçantë ndodhi gjatë vizitës së kancelarit gjerman Friedrich Merz në Shtëpinë e Bardhë, ku takimi me Presidentin amerikan Donald Trump nisi me një dhuratë simbolike. Merz i dorëzoi Trump-it certifikatën e lindjes së gjyshit të tij, Fredrich Trump, i cili ka lindur në Kallstadt, një fshat i vogël në rajonin e Pfalzit, në jugperëndim të Frankfurtit.
Ky gjest kujton traditën e ngjashme të kryeministrit britanik Sir Keir Starmer, i cili gjithashtu përdori një dhuratë personale si hyrje në diplomaci. Trump reagoi me një buzëqeshje dhe falënderim, duke theksuar lidhjet e tij të thella me Gjermaninë, krahas atyre me Skocinë, nga ku ishte origjina e nënës së tij.
Historia e familjes Trump nis me emigrimin e gjyshit të tij Fredrich në SHBA në vitin 1885, fillimisht në Nju Jork dhe më pas në Seattle, ku ndërtoi pasurinë e tij përmes investimeve në pasuri të paluajtshme dhe restorante.
Momenti është komentuar gjerësisht në mediat ndërkombëtare si një shenjë e afrimit simbolik mes Berlinit dhe Uashingtonit në një kohë sfidash të reja globale.
