LEZHË – Të shtëna me armë zjarri kanë tronditur mbrëmjen e sotme qendrën e fshatit Rrilë. Një 30-vjeçar ka mbetur i plagosur pas një atentati të mirëfilltë brenda një ambienti që shërbente si berberhane.
Dinamika e ngjarjes Burime nga vendngjarja bëjnë me dije se shënjestra ishte shtetasi Sokol Daci. Autori, ende i paidentifikuar, dyshohet se ka hapur zjarr me breshëri automatiku drejt të riut, duke krijuar panik në zonë. 30-vjeçari Daci është transportuar me urgjencë drejt spitalit rajonal dhe fatmirësisht raportohet se ndodhet jashtë rrezikut për jetën.
Autori në arrati Menjëherë pas të shtënave, autori është larguar me shpejtësi nga vendngjarja, duke përfituar nga errësira. Forca të shumta policie kanë mbërritur në fshatin Rrilë dhe kanë rrethuar zonën. Aktualisht po kryhet krehja e territorit dhe po mblidhen dëshmi e prova materiale për të bërë të mundur identifikimin dhe kapjen e atentatorit. Motivet e ngjarjes mbeten ende të paqarta.
