Strukturat hoteliere në Durrës raportojnë një fluks të lartë rezervimesh për festat e fundvitit, duke konfirmuar qytetin bregdetar si një destinacion kryesor dimëror. Të dhënat e para tregojnë një ndryshim të rëndësishëm në demografinë e vizitorëve këtë vit, me një rritje të ndjeshme të interesit nga shtetasit e huaj.
Sipas operatorëve turistikë në zonën e plazhit, kapacitetet shfrytëzuese kanë arritur nivelin 90 për qind. Blerim Norja, menaxher i një prej hoteleve të zonës, bën një dallim të qartë mes dy festave kryesore.
“Hoteli ynë ka përgatitur dy oferta. Për Krishtlindje jemi plotësisht të rezervuar, ku dominon tregu vendas, kryesisht qytetarë nga Durrësi dhe Tirana. Megjithatë, risia e këtij viti qëndron te paketa e Vitit të Ri, ku 90 për qind e rezervimeve janë kryer nga shtetas të huaj”, shprehet Norja.
Tradita si atraksion turistik
Faktori kryesor që po tërheq të huajt drejt Durrësit në këtë periudhë duket se është autenticiteti i festimeve. Kulinaria lokale, mikpritja dhe mënyra tradicionale e festimit po kthehen në asete të rëndësishme për turizmin.
“Ajo që i tërheq është tradita shqiptare. Viti i Ri në Shqipëri ka karakteristika të veçanta, nga përgatitja e ushqimeve deri te forma e festimit me muzikë dhe valle tradicionale”, shton menaxheri.
Përtej festave të dhjetorit, pritshmëritë për vitin e ardhshëm mbeten pozitive. Sektori pret një rivitalizim të menjëhershëm në fillim të pranverës, me konfirmimin e ardhjes së grupeve turistike të organizuara nga Austria.
