Përplasen motorat e ujit, plagoset i riu në plazh në Kavajë
Një aksident detar ka ndodhur pasditen e së shtunës në zonën turistike të Golemit, Kavajë, ku dy motora uji (Jet Ski) janë përplasur mes tyre gjatë lundrimit, duke lënë të plagosur një 31-vjeçar nga Kosova.
Sipas të dhënave paraprake të Policisë Kufitare, ngjarja ndodhi rreth orës 17:36 në vendin e quajtur “Manhatan”, rreth 800 metra larg perimetrit të sigurisë ujore, në një zonë të lejuar për lundrim.
Të përfshirë në aksident ishin:
- S. D., 25 vjeç, lindur në Çorovodë, drejtues i një Jet Ski;
- P. B., 31 vjeç, lindur në Kosovë, drejtues i një tjetër Jet Ski.
Si pasojë e përplasjes, P. B. pësoi dëmtime fizike dhe u transportua menjëherë në spital nga patrulla e Policisë Kufitare që po monitoronte vijën bregdetare. Burime zyrtare konfirmojnë se ai ndodhet jashtë rrezikut për jetën.
Ndërkohë, shtetasi S. D. është shoqëruar në Komisariatin e Policisë Kavajë për veprime të mëtejshme procedurale dhe sqarimin e plotë të rrethanave të ngjarjes.
Sipas verifikimeve të para, të dy drejtuesit po lundronin në bashkëpunim dhe ishin të pajisur me jelekë shpëtimi në momentin e ngjarjes.
Grupi hetimor vijon punën për dokumentimin e plotë të aksidentit dhe për të përcaktuar përgjegjësitë ligjore që mund të ngrihen ndaj palëve të përfshira