Në kuadër të masave për sigurinë rrugore gjatë sezonit turistik, Drejtoria Vendore e Policisë Vlorë ka intensifikuar kontrollet në të gjitha akset kryesore urbane dhe interurbane të qarkut, duke u fokusuar në parandalimin e shkeljeve që rrezikojnë jetën e përdoruesve të rrugës.
Gjatë 10 ditëve të para të muajit qershor, strukturat e Qarkullimit Rrugor në Vlorë dhe Sarandë kanë kryer kontrolle të vazhdueshme, me qëllim menaxhimin e fluksit në zonat turistike dhe garantimin e një ambienti të sigurt për qytetarët dhe vizitorët.
Si rezultat i kontrolleve:
- 16 drejtues mjetesh janë arrestuar ose proceduar penalisht për shkelje të rënda të Kodit Rrugor.
- 1683 masa administrative janë vendosur, për shkelje të tilla si:
• tejkalim i shpejtësisë së lejuar
• parakalime të gabuara
• mosvënia e rripit të sigurimit
• përdorimi i celularit gjatë drejtimit
• mungesa e kaskës nga drejtuesit e motomjeteve
• drejtimi i mjetit në gjendje të dehur
• shkelje të tjera në kundërshtim me ligjin
Policia Rrugore do të vijojë kontrollet intensive përgjatë gjithë sezonit veror në qarkun Vlorë, me fokus në parandalimin e aksidenteve dhe ruajtjen e jetës së qytetarëve në rrugë.
Drejtoria Vendore e Policisë Vlorë u bën thirrje të gjithë përdoruesve të rrugës të respektojnë rregullat e qarkullimit, si dhe të bashkëpunojnë me autoritetet duke denoncuar çdo rast që cenon sigurinë rrugore në numrin falas 112.