Festimet për triumfin historik të Paris Saint-Germain në Ligën e Kampionëve u shoqëruan me trazira në mbarë Francën, duke lënë pas një bilanc tragjik. Dy persona humbën jetën, një oficer policie ndodhet në koma dhe qindra të tjerë u arrestuan në ngjarjet që pasuan fitoren 5-0 të PSG-së ndaj Interit të Milanit në finalen e madhe të futbollit evropian.
Sipas autoriteteve franceze, një 17-vjeçar humbi jetën në qytetin Dax pasi u godit me thikë gjatë natës, ndërsa një 23-vjeçar u vra në qendër të Parisit pasi u përplas nga një automjet. Të dy rastet po hetohen për të përcaktuar lidhjen e mundshme me festimet.
Në një konferencë për shtyp, shefi i policisë së Parisit, Laurent Nunez, bëri të ditur se janë arrestuar 491 persona vetëm në rajonin e Parisit, ndërsa janë raportuar 192 të plagosur, mes tyre nëntë policë dhe katër civilë me lëndime të rënda. Po ashtu, u plaçkitën katër dyqane, përfshirë një në zonën luksoze Champs Élysées.
Pavarësisht se shumica e festimeve ishin paqësore, në disa zona ato degraduan në akte dhune dhe vandalizmi, duke errësuar triumfin e parë të PSG-së në historinë e Ligës së Kampionëve.