Procesi i numërimit të votave në nivel kombëtar ka kaluar gjysmën e kutive të hapura, me mbi 2,900 nga 5,225 kuti të numëruara deri në këto momente. Sipas të dhënave të deritanishme, Partia Socialiste kryeson me një përqindje të qartë prej 52.6%, duke siguruar rreth 290 mijë vota.
Në vend të dytë renditet koalicioni i Partisë Demokratike dhe Aleancës për Shqiptarët dhe Migrantët me 34.4% të votave, ose rreth 190 mijë vota në rang vendi. Ndërkohë, Partia Social-Demokrate (PSD) e Tom Doshit është forca e tretë politike me 4% të votave, përkthyer në rreth 22 mijë vota.
Surprizat e këtij procesi zgjedhor vijnë nga partitë e vogla dhe lëvizjet e reja, të cilat, sipas projeksioneve, do të përfaqësohen për herë të parë në Kuvend. “Mundësia”, “Nisma – Shqipëria Bëhet” dhe Lëvizja “Bashkë” pritet të marrin nga një mandat secila.
Në total, ndarja paraprake e mandateve është si vijon:
- Partia Socialiste: 83 deputetë
- Koalicioni PD-ASHM: 51 deputetë
- PSD: 3 deputetë
- Mundësia, Nisma dhe Bashkë: nga 1 deputet secila
Ky rezultat tregon një shumicë të qartë për Partinë Socialiste, ndërkohë që opozita ruan një bazë të konsiderueshme votash. Megjithatë, prania e forcave të reja politike në Kuvend sinjalizon një riformatim të pjesshëm të skenës parlamentare.
Procesi i numërimit vazhdon në të gjithë vendin, ndërsa vëmendja tashmë po fokusohet te qarqet ku gara për mandatet është ende e ngushtë