Autoritetet britanike kanë publikuar listën me emrat dhe fotot e tetë shqiptarëve të deportuar, të cilësuar si ndër më të rrezikshmit në Mbretërinë e Bashkuar. Ata janë dënuar për krime të rënda, përfshirë vrasje, trafik droge dhe dhunë me armë.
Sipas “Daily Mail”, këta të dënuar janë pjesë e një marrëveshjeje dypalëshe mes Britanisë dhe Shqipërisë, e cila parashikon që kriminelët shqiptarë të vuajnë dënimin në vendin e tyre, ndërsa kostot financiare mbulohen nga qeveria britanike. Programi, me një kosto prej 4.3 milionë paund, është zbatuar prej dy vitesh, por deri më tani vetëm tetë persona janë transferuar, ndërsa mbi 1,200 shqiptarë mbeten ende në burgjet e Mbretërisë së Bashkuar.
Kush janë të deportuarit?
1.Klodjan Copja, 30 vjeç – Drejtues i një rrjeti të madh të trafikut të kokainës, me një aktivitet kriminal që kap vlerën e 60 milionë paundëve.
2.Erald Mema, 40 vjeç – Kreu i një bande droge, i dënuar me 25 vjet burg. Gjatë arrestimit iu gjetën 560,000 paund cash, të ardhura nga trafiku i drogës në Midlands dhe Oxford.
3.Gentjan Dervishaj, 33 vjeç – Organizator i trafikut të 11 milionë paundëve drogë në verilindje të Britanisë.
4.Elion Gllava, 29 vjeç – I dënuar për komplot për lëndime të rënda trupore dhe posedim të një arme zjarri. I përfshirë në një përplasje të dhunshme me armë në Oldham, Manchester, ku një person u plagos rëndë në vitin 2021.
5.Andon Bita, 49 vjeç – Pjesë e të njëjtës ngjarje si Gllava. I dënuar me 17 vjet burg për plagosje të rëndë, armëmbajtje dhe trafik droge.
6.Dardan Dollapaj, 25 vjeç – I akuzuar për tentativë vrasjeje pas një sulmi me thikë në Hounslow High Street, Londër, në vitin 2019.
7.Rufat Kasamaj, 38 vjeç – Grabitqar seksual, i dënuar me 10 vjet e gjysmë burg për përdhunimin e një vajze 15-vjeçare në një qendër tregtare në Londër.
8.Dolimar Sejdiu, 24 vjeç – I dënuar për plagosje të rëndë dhe dhunë në Londrën Perëndimore pesë vite më parë.
Marrëveshja e transferimit dhe sfidat
Britania ka investuar 4.3 milionë paund për të modernizuar burgjet shqiptare në këmbim të pranimit të të dëbuarve. Çdo kriminel i kthyer i ka kushtuar taksapaguesve britanikë rreth 537,500 paund.
Pjesë e marrëveshjes ishte edhe blerja e 15 makinave elektrike dhe 22 mikrobusëve për transportin e të burgosurve në Shqipëri. Megjithatë, procesi i deportimit është ngadalësuar nga burokracia në Shqipëri, pasi gjykatat shqiptare kërkojnë të miratojnë çdo dënim të dhënë nga autoritetet britanike. Aktualisht, 59 të dënuar të tjerë shqiptarë ndodhen ende në burgjet britanike, në pritje të vendimit për transferim.
Ndërkohë, një nga kriminelët më famëkeq, Koci Selamaj, i cili vrau mësuesen Sabina Nessa në Londër në 2021, vazhdon të vuajë dënimin 36-vjeçar në burgun psikiatrik Broadmoor. Ai ka marrë edhe një dënim shtesë prej 4 vite e gjysmë për një sulm me thikë ndaj një oficeri burgu.
Reagimet dhe kritikat
Skema e deportimit është kritikuar për vonesat e saj, ndërsa mediat britanike raportojnë se sistemi gjyqësor shqiptar është i mbingarkuar dhe shpesh zvarrit procedurat. Një burim nga drejtësia shqiptare tha për “Daily Mail”:
“Procesi kërkon kohë për shkak të numrit të madh të dosjeve të prapambetura dhe procedurave të gjata gjyqësore në Shqipëri.”
Ndërkohë, autoritetet britanike vijojnë përpjekjet për të përshpejtuar kthimin e të dënuarve të tjerë, duke kërkuar që marrëveshja të zbatohet në mënyrë më efikase.