LEUVEN (Belgjikë) – Mario Draghi, njeriu që shpëtoi Eurozonën një dekadë më parë, ka lëshuar një nga paralajmërimet e tij më të zymta dhe direkte për të ardhmen e kontinentit. Gjatë ceremonisë së nderimit me titullin Honoris Causa në universitetin belg KU Leuven, ish-kryeministri italian deklaroi se Europa rrezikon të bëhet “e nënshtruar, e përçarë dhe e deindustrializuar”, nëse nuk ndryshon rrënjësisht strukturën e saj politike.
Mes dy gjigantëve: SHBA dhe Kina Draghi theksoi se Europa gjendet sot e shtrënguar si në një “mospërshtatje” mes dy superfuqive: Shteteve të Bashkuara dhe Kinës.
“Duhet të vendosim: mbetemi thjesht një treg i madh, i nënshtruar prioriteteve të të tjerëve? Apo hedhim hapat e nevojshëm për t’u bërë një fuqi?” – pyeti ai, duke nënvizuar se vetëm europianët kanë ende mundësinë të bëhen vetë një pol fuqie.
Zgjidhja: Nga Konfederatë në Federatë Sipas Draghit, modeli aktual i Bashkimit Europian nuk mjafton më. Ai bëri thirrje për kalimin nga një bashkim shtetesh (konfederatë) në një shtet federal të mirëfilltë. “Aty ku Europa është federuar – në tregti, konkurrencë, tregun e vetëm, politikën monetare – respektohemi si fuqi dhe negociojmë si një subjekt unik,” argumentoi ai, duke sjellë si shembull suksesin e marrëveshjeve tregtare me Indinë dhe Amerikën Latine.
Akuza e fortë ndaj Uashingtonit Pjesa më tronditëse e fjalimit ishte analiza e tij mbi ndryshimin e qëndrimit amerikan. Sipas Draghit, aleati historik përtej Atlantikut ka ndryshuar strategji. “Shtetet e Bashkuara, në pozicionin e tyre aktual, kërkojnë dominim bashkë me partneritetin… Ata vendosin tarifa ndaj Europës, kërcënojnë interesat tona dhe e bëjnë të qartë, për herë të parë, se e konsiderojnë fragmentimin politik europian funksional për interesat e tyre,” – deklaroi Draghi.
Samiti i 12 Shkurtit Ky fjalim vjen si prelud i samitit informal të BE-së që do të mbahet më 12 shkurt në Alden Biesen. Presidenti i Këshillit Europian, Antonio Costa, ka ftuar pikërisht Mario Draghin dhe Enrico Lettën për t’u prezantuar liderëve të 27 vendeve vizionin e tyre mbi shpëtimin e konkurrueshmërisë europiane në këtë rend të ri botëror, ku rregullat e vjetra nuk vlejnë më.
