UASHINGTON/MOSKË – Përçarja gjithnjë e më e thellë mes Shteteve të Bashkuara dhe Bashkimit Europian po krijon një terren pjellor për rikthimin agresiv të Rusisë në Ballkan. Alarmi vjen pas deklaratave të Ministrit të Jashtëm rus, Sergei Lavrov, i cili konfirmoi këtë javë se Moska ka hapur kanale direkte komunikimi me administratën amerikane për zhvillimet në rajon, duke anashkaluar Brukselin.
Moska anashkalon BE-në, flet direkt me Trump Në një lëvizje që sfidon status-quo-në e dekadave të fundit, Lavrov deklaroi se: “Kemi më shumë mundësi për të komunikuar me SHBA-në sesa me BE-në për Ballkanin, veçanërisht për Bosnjën. Kolegët tanë amerikanë janë të gatshëm t’i zhvillojnë këto kontakte”. Ndërkohë që Departamenti i Shtetit nuk i është përgjigjur pyetjeve të Radios Evropa e Lirë mbi këto negociata, heshtja e Uashingtonit dhe zbutja e sanksioneve ndaj liderit serb të Bosnjës, Millorad Dodik, kanë rritur frikën se SHBA-ja po ndryshon kurs.
Alarmi i Kurtit dhe rreziku i “Skenarit të Krimesë” Kryeministri i Kosovës, Albin Kurti, nga Davosi paralajmëroi për një kërcënim të tërthortë rus përmes Serbisë. “Kushdo që ndihmon fqinjin tonë verior të na destabilizojë, na shkakton probleme. Kërcënimi ynë më i afërt është Federata Ruse,” – tha Kurti. Ekspertët paralajmërojnë se Rusia synon të përdorë krizat në Ballkan, veçanërisht brishtësinë etnike në Bosnje dhe tensionet Kosovë-Serbi, si “karta negociuese” me Perëndimin për çështjen e Ukrainës.
Ekspertët: “Ëndrra e Moskës u bë realitet” Ivana Stradner nga Fondacioni për Mbrojtjen e Demokracisë thekson se çarja SHBA-BE është “një ëndërr e bërë realitet për Moskën”. Sipas saj, Rusia mund të nxisë Millorad Dodikun për të përshkallëzuar krizën dhe më pas të ofrohet si “zjarrfikëse” në këmbim të lëshimeve gjeopolitike. Nga ana tjetër, Charles Kupchan nga Këshilli për Marrëdhënie me Jashtë në Uashington, e cilëson të rrezikshme qasjen e re amerikane. “Heqja e sanksioneve ndaj Dodikut dhe anashkalimi i BE-së e vendos pa dashje Uashingtonin në të njëjtën vijë me Moskën në Bosnje,” – analizon ai.
Për Kosovën, këshilla e ekspertëve është e qartë: në këtë klimë të paparashikueshme, Prishtina duhet të forcojë lidhjet me Bashkimin Europian dhe të tregohet jashtëzakonisht e kujdesshme diplomatikisht në raport me Uashingtonin.
