Pas Australisë, edhe Mbretëria e Bashkuar po bën kthesën e madhe. Qeveria britanike ka njoftuar zyrtarisht nisjen e një konsultimi për të ashpërsuar rregullat, duke shqyrtuar seriozisht ndalimin e aksesit në rrjetet sociale për fëmijët nën 16 vjeç.
Edhe pse Kryeministri Keir Starmer fillimisht ishte skeptik, presioni i jashtëzakonshëm nga prindërit, mësuesit dhe deputetët (madje edhe brenda partisë së tij) e ka detyruar qeverinë të ndryshojë kurs.
Çfarë do të diskutohet konkretisht? Plani nuk është thjesht një “Ndalim”, por një rregullim drastik i mënyrës se si fëmijët ndërveprojnë me teknologjinë:
-
Rritja e moshës: A duhet të rritet pragu i “pëlqimit digjital” (mosha kur lejohesh të hapësh llogari)?
-
Verifikimi i Moshës: Si mund të bëhet teknologjia e verifikimit e pagabueshme, që fëmijët të mos gënjejnë për vitin e lindjes.
-
Heqja e “Varësisë”: Ndalimi i veçorive që krijojnë varësi, si “shkrimi i pafund” (infinite scroll) apo “vijat” (streaks – shpërblimet për përdorim të përditshëm).
Beteja Politike: Qeveria vs. Lordët Lëvizja e qeverisë vjen për të “parandaluar” një rebelim në Parlament. Ish-ministri konservator, Lord Nash, ka paraqitur një amendament që kërkon masa urgjente dhe sisteme “shumë efektive” bllokimi.
-
Kritika: Lord Nash e quajti konsultimin e qeverisë një taktikë vonuese. “Sa më shumë të vonojmë, aq më shumë fëmijë i lëmë të ekspozuar,” tha ai.
-
Qëllimi: Ministrja e Teknologjisë, Liz Kendall, theksoi se synimi është që “teknologjia të pasurojë jetën e fëmijëve, jo t’u shkaktojë dëm”.
Shkollat: “Hapësira pa Celularë” Paralelisht me rrjetet sociale, po ashpërsohet lufta kundër telefonave në klasa.
-
Departamenti i Arsimit po kërkon që shkollat të jenë zona totalisht pa celularë.
-
Realiteti: Edhe pse 90-99% e shkollave kanë rregulla ndaluese, zbatimi çalon. 58% e nxënësve pranojnë se telefonat përdoren në mësime pa leje (shifra shkon në 65% për grupmoshën 14-16 vjeç).
