Drejtoria për Hetimin e Krimit Kibernetik në Policinë e Shtetit ka lëshuar një paralajmërim urgjent për një fushatë masive mashtrimi (phishing) që po qarkullon në aplikacionin e komunikimit “WhatsApp”.
Qëllimi i këtij sulmi është vjedhja dhe marrja e kontrollit të llogarive të qytetarëve shqiptarë.
Si funksionon skema?
Mashtrimi është i sofistikuar sepse shpesh vjen nga kontakte të njohura (miq apo të afërm), llogaritë e të cilëve tashmë janë kompromentuar.
-
Mesazhi: Ju vjen një kërkesë për të votuar për një person (shpesh prezantohet si i afërm i dërguesit) për të fituar çmimin e parë të një “burse falas”.
-
Karremi: Për të votuar, ju kërkohet të klikoni një link të rremë.
-
Kurthi: Faqja ju kërkon të vendosni një kod verifikimi që ju vjen në telefon. Në momentin që ju e jepni këtë kod, autorët marrin kontrollin e WhatsApp-it tuaj dhe e përdorin atë për të mashtruar kontaktet tuaja.
Thirrja e Policisë: Aktivizoni sigurinë shtesë
Policia e Shtetit bën thirrje për kujdes maksimal dhe kërkon nga qytetarët të ndjekin këto hapa:
-
Injoroni linqet: Mos klikoni asnjë link të dyshimtë, edhe nëse vjen nga njerëz të besuar, pa konfirmuar më parë me ta (me telefonatë) nëse e kanë dërguar vërtet ata.
-
Mos jepni kode: Kurrë mos ndani kodet 6-shifrore të verifikimit me askënd.
-
Mbrojtja: Aktivizoni urgjentisht “Two-step verification” (Verifikimi me dy hapa) në cilësimet e WhatsApp. Kjo vendos një PIN sigurie që hakerat nuk mund ta kalojnë lehtë.
Çdo rast i dyshimtë duhet të raportohet menjëherë pranë strukturave të Krimit Kibernetik.
