Fundjava dhe afrimi i festave të fundvitit kanë sjellë fluks të lartë lëvizjesh në pikën e kalimit kufitar të Qafë Thanës. Raportohet për radhë të gjata mjetesh si në hyrje, ashtu edhe në dalje të territorit shqiptar, ku automjetet janë rreshtuar në dy dhe tre korsi.
Situata operacionale dhe shkaqet
Pavarësisht se autoritetet kufitare po punojnë me kapacitet të shtuar, duke vënë në dispozicion nga 3 sportele në secilin sens lëvizjeje, qytetarëve u duhet të presin të paktën 40 minuta për të kryer procedurat e kalimit.
Sipas Policisë Kufitare, faktorët që kanë çuar në këtë mbingarkesë janë të shumëfishtë:
-
Lëvizjet e zakonshme të fundjavës dhe vizitat e shqiptarëve të Maqedonisë së Veriut drejt Shqipërisë.
-
Lëvizja e banorëve të zonave kufitare (Pogradec dhe Përrenjas), të cilët kalojnë kufirin për të kryer blerjet e festave, të nxitur nga çmimet më të lira në tregjet e Maqedonisë së Veriut.
-
Kthimi i emigrantëve nga Greqia, një pjesë e të cilëve po përdorin Qafë Thanën si alternativë për të shmangur fluksin në pikën e Kapshticës.
Autoritetet parashikojnë që intensitet i lëvizjeve të vijë në rritje gjatë gjithë orëve të ditës dhe të vijojë me ritme të larta deri në natën e ndërrimit të viteve.
