Pas skenave të tensionit, bllokimit dhe kaosit që dominuan seancën e sotme plenare, Kryetari i Kuvendit, Niko Peleshi, ka reaguar përmes një qëndrimi zyrtar ku dënon ashpër degradimin e etikës parlamentare. Peleshi theksoi se institucioni më i lartë i Republikës nuk mund të trajtohet si një arenë për beteja personale apo partiake, por duhet të jetë vendi ku fjala dhe sjellja dëshmojnë përgjegjshmëri dhe i shërbejnë mirëkuptimit, jo përçarjes.
Në mesazhin e tij, kreu i Kuvendit nënvizoi se bashkëpunimi mes palëve është një detyrim ndaj qytetarëve dhe se interesi i shtetit duhet të prevalojë gjithmonë mbi llogaritë e ngushta politike. Sipas tij, asnjë forcë politike nuk zotëron monopolin e së vërtetës dhe çdo veprim që cenon rregullat e funksionimit të Kuvendit, automatikisht dëmton dinjitetin e përfaqësimit.
Duke bërë thirrje për dialog serioz në vend të kaosit, Peleshi e mbylli reagimin e tij me një falënderim të veçantë për punonjësit e Gardës së Republikës dhe administratën e Kuvendit, duke vlerësuar korrektesën dhe profesionalizmin e tyre në menaxhimin e situatës së vështirë të krijuar në sallë.
