Pas përfundimit të mbledhjes së grupit parlamentar të Partisë Demokratike, Gazment Bardhi ka dalë në një deklaratë për mediat ku ka legjitimuar dhe vlerësuar tensionet e sotme në sallën e Kuvendit. Ai i përgëzoi kolegët e tij opozitarë, duke e cilësuar kaosin dhe përplasjet si një akt ku ata “u ngritën në lartësinë e detyrës” për t’i shërbyer interesit publik përballë mazhorancës.
Bardhi konfirmoi zyrtarisht se opozita do të marrë pjesë nesër në mbledhjen e Këshillit të Mandateve, ku do të shqyrtohet kërkesa e SPAK për heqjen e imunitetit të zëvendëskryeministres Belinda Balluku. Ai bëri të qartë se vota e PD do të jetë pro drejtësisë dhe pro ndëshkimit të asaj që ai e quajti “zyrtare të korruptuar të Ramës”, duke theksuar se korrupsioni i saj nuk mund të fshihet.
Megjithatë, kreu i grupit të PD denoncoi shkeljet e rënda procedurale nga ana e Kryetarit të Kuvendit, Niko Peleshi. Bardhi akuzoi Peleshin se po u mohon deputetëve qasjen në provat dhe urdhrin e prokurorisë, duke argumentuar se sekreti hetimor ndalon të pandehurën të njihet me dosjen, por jo ligjvënësit që duhet të votojnë.
Në fund, Bardhi lëshoi akuza të forta dhe fyese ndaj Endri Shabanit, i cili u votua sot si Avokat i Popullit mes tymit dhe zhurmës. Ai e etiketoi Shabanin si “karagjoz” që provokonte opozitën duke puthur me duar nga salla, dhe e cilësoi këtë emërim si një degradim të përfaqësimit institucional të orkestruar nga kryeministri Rama.
