Një tragjedi që ka tronditur SHBA-në ka në qendër një ish-aleat afgan, i cili dikur luftonte krah forcave amerikane, por që së fundmi ktheu armët kundër tyre. 29-vjeçari Lakanwal, i akuzuar për pritën fatale që i mori jetën 20-vjeçares Sarah Beckstrom dhe plagosi rëndë ushtarin Andrew Wolfe, po shfaqet gjithnjë e më shumë si një figurë komplekse e torturuar nga demonët e së shkuarës.
Dokumente dhe e-maile të zbuluara së fundmi dëshmojnë për një rënie drastike të shëndetit të tij mendor përpara sulmit. Raportet e punonjësve socialë përshkruajnë një burrë të izoluar, që kalonte javë të tëra i mbyllur në errësirë, pa komunikuar me familjen dhe duke vuajtur nga episode maniake. Miq të tij të fëmijërisë sugjerojnë se ai vuante nga trauma të rënda (PTSD) që buroin nga koha kur shërbente në Afganistan si pjesë e “Njësisë Zero” – një grup elitar paraushtarak i lidhur me CIA-n.
Ndërsa ndodhet në spital nën akuza për vrasje, autoritetet po përpiqen të zbërthejnë motivin. Sekretarja e Sigurisë Kombëtare, Kristi Noem, ka hedhur hipotezën e një “radikalizimi” të mundshëm pas mbërritjes në SHBA në vitin 2021. Paradoksalisht, Lakanwal sapo kishte fituar azilin politik në fillim të këtij viti, duke e bërë aktin e tij edhe më të pashpjegueshëm për hetuesit që po kërkojnë arsyen pse një ish-bashkëpunëtor i besuar u kthye në një vrasës të ushtarëve amerikanë.
