Presidenti serb, Aleksandar Vuçiç, ka lëshuar një paralajmërim të mprehtë për një konflikt të ardhshëm global, duke deklaruar se fuqitë e mëdha të botës kanë filluar tashmë përgatitjet e tyre për luftë.
Gjatë inaugurimit të linjës së re hekurudhore Beograd-Suboticë, Vuçiç paraqiti një pamje të errët të së ardhmes: “Situata në botë do të bëhet gjithnjë e më e vështirë. Të gjithë po përgatiten për luftë, dhe kur të gjithë përgatiten për luftë, kjo do të thotë se ajo do të ndodhë. Dhe po ju them, do të ndodhë me siguri.”
Sipas tij, fuqitë botërore kanë braktisur dialogun dhe negociatat në favor të përgatitjeve të drejtpërdrejta për konflikt. “Ata po hapin llogare dhe po presin fillimin, sepse e dinë që lufta do të vijë gjithsesi,” u shpreh lideri serb.
Vuçiç shprehu pesimizëm në lidhje me mundësinë për të parandaluar një konflikt të tillë: “Do të jepja gjithçka që kam që kjo të mos ndodhë, por për fat të keq, kam frikë se kam të drejtë.”
Duke përmbledhur, Vuçiç theksoi se Serbia do të duhet të përgatitet për çdo skenar të mundshëm, duke shtuar se ushtria serbe është gati, por do të duhet të forcohen edhe përgatitjet e tjera.
