Një vizitë me simbolikë të fortë politike dhe fetare u zhvillua sot në Jerusalemin e Vjetër, ku senatori amerikan Marco Rubio u shoqërua nga kryeministri izraelit Benjamin Netanyahu dhe ish-guvernatori amerikan Mike Huckabee në Murin Perëndimor, i njohur ndryshe si “Muri i Lotëve”.
Delegacioni ndoqi traditën e vendosjes së mesazheve të shkruara në çarjet e murit, një ritual i lashtë që simbolizon besimin dhe shpresën. Rubio, i emocionuar nga ceremonia, mori pjesë në lutjen e udhëhequr nga Mordechai Shuli Eliav, drejtues i Fondacionit të Trashëgimisë së Murit Perëndimor.
Burime pranë delegacionit zbuluan se pas lutjes, Netanyahu dhe Rubio zhvilluan një bisedë të shkurtër konfidenciale pranë murit. Sipas raportimeve, mesazhi që kryeministri izraelit i përcolli senatorit amerikan kishte të bënte me forcimin e aleancës SHBA–Izrael dhe mbështetjen e pakushtëzuar në një periudhë të tensionuar për rajonin.
Pas vizitës në Mur, delegacioni u njoh nga afër edhe me tunelet nëntokësore, të cilat shtrihen poshtë Lagjes Myslimane, një zonë me ngarkesë të madhe historike dhe politike.
Vizita e Rubio-s shikohet si një sinjal i qartë i përkushtimit të administratës amerikane ndaj sigurisë së Izraelit dhe forcimit të marrëdhënieve strategjike mes dy vendeve.
