Një shtëpi në fshatin polak Wyryki-Wola thuhet se mund të kishte shkaktuar një krizë globale pasi u godit nga një dron rus, vetëm disa milje larg një baze të NATO-s. Sipas mediave të huaja, sulmi ka shkatërruar plotësisht çatinë dhe brendësinë e banesës, duke lënë dhomat e ekspozuara ndaj qiellit dhe duke shpërndarë sende të thyera kudo.
Pronari dhe gruaja e tij, një çift i moshuar që jeton me dy kafshët e shtëpisë, ishin në gjumë kur droni goditi shtëpinë. Ata përshkruan momentin si “një shpërthim të fuqishëm, një bum i vetëm”, duke theksuar se gjithçka ku po flinin u shkatërrua. Megjithatë, ata arritën të ngrihen dhe të zbrisnin jashtë, duke shpëtuar jetën.
Burri tha se edhe papafingo ishte shkatërruar, dhe dhoma e gjumit kishte një vrimë të madhe në tavan. Gruaja shtoi se për momentin nuk mund të kthehen në shtëpi dhe po qëndrojnë pranë një shkollë, ku ka një hotel, ndërsa kryebashkiaku lokal i ka vendosur përkohësisht në bibliotekën e qytetit. Çifti ka dy fëmijë të rritur që jetojnë në një qytet tjetër.
Daily Mail thekson se droni që ra në një fushë ishte vetëm shtatë milje larg një baze të NATO-s. Në rast se banorët do të ishin vrarë, ngjarja mund të kishte aktivizuar Nenin 5 të traktatit të mbrojtjes kolektive të NATO-s, i cili trajton një sulm ndaj një anëtari si një sulm ndaj të gjithëve, duke rritur perspektivën e një lufte globale.
Brenda shtëpisë, dhoma e ndenjes është e mbushur me mbeturina dhe dru të thyer, ndërsa pluhuri ka mbuluar çdo sipërfaqe. Mobiljet janë shtypur dhe sendet shtëpiake janë shpërndarë kudo në dysheme.
Ngjarja ka ngjallur shqetësim në Evropë, e cila tashmë i afrohet momentit më të rrezikshëm nga Lufta e Dytë Botërore, sipas analistëve të sigurisë. Ky incident vë në pah tensionet e larta dhe rrezikun real të përshkallëzimit të konfliktit rajonal në një përplasje globale.
