DVP Fier
Dy shtetas janë arrestuar nga policia, të dyshuar si autorë të zjarrvënieve në Divjakë dhe Mallakastër, që shkaktuan dëme të konsiderueshme në sipërfaqe toke dhe pemëtari.
Në Divjakë u arrestua 65-vjeçari K. A., banues në fshatin Korije, i cili kishte ndezur zjarr për djegien e mbeturinave në një tokë të marrë me qira, por flakët dolën jashtë kontrollit dhe dogjën 170 rrënjë ulliri në pronësi të një shtetasi tjetër.
Në Mallakastër, u vunë në pranga 41-vjeçari P. J., banues në fshatin Belishovë. Ai kishte ndezur zjarr për të pastruar ferrat në tokën e tij, por zjarri u përhap dhe dogji një sipërfaqe me shkurre.
Arrestimet u kryen nga specialistët për Hetimin e Krimeve të Komisariateve të Divjakës dhe Mallakastrës, në kuadër të hetimeve për dokumentimin e rasteve të zjarrvënies dhe ndëshkimin e autorëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.
Policia e Fierit apelon qytetarët që të mos ndezin zjarre në asnjë rrethanë, pasi kjo përbën vepër penale. Çdo rast i tillë mund të denoncohet në numrin 112, me garanci për anonimat dhe reagim të shpejtë nga strukturat policore.