Pogradec – Vrau partneren 21 vjet më të madhe, Prokuroria e Korçës lëshon urdhër arresti për 31-vjeçarin Ilirjan Selmani.
Prokuroria pranë Gjykatës së Shkallës së Parë të Juridiksionit të Përgjithshëm Korçë ka lëshuar urdhër arresti për Ilirjan Selmanin, i cili akuzohet si autor i vrasjes së 52-vjeçares Kozeta Teço, me të cilën kishte një lidhje disa vjeçare.
Ngjarja e rëndë ndodhi mbrëmjen e së dielës, në banesën e viktimës në Pogradec, ku çifti jetonte prej kohësh. Sipas hetimeve paraprake, Selmani e kishte kaluar edhe atë natë në banesë, si zakonisht, para se të ndodhte krimi.
Gjatë marrjes në pyetje, 31-vjeçari ka mohuar autorësinë, por policia dhe prokuroria kanë grumbulluar prova të mjaftueshme, të cilat dokumentojnë të gjithë dinamikën e ngjarjes – që nga momenti i vrasjes, deri në largimin e autorit nga banesa.
Ilirjan Selmani ndodhej fillimisht në ndalim policor, por me provat e reja të siguruara, Prokuroria ka nxjerrë urdhër të formës së prerë për arrestimin e tij.
Hetimet po vijojnë për të zbardhur plotësisht motivet dhe rrethanat e vrasjes, ndërsa policia pritet të zbatojë menjëherë vendimin e organit të akuzës.
Ngjarja ka tronditur opinionin publik për shkak të diferencës së madhe në moshë mes çiftit, dhe aktit të rëndë kriminal brenda një marrëdhënieje në dukje të qëndrueshme
