Një zjarr i fuqishëm ka shkaktuar panik pasditen e sotme në lagjen Granicë të Gjirokastrës, ku flakët u përhapën me shpejtësi në bimësinë e thatë pranë përroit dhe rrezikuan seriozisht zonën e banuar.
Ngjarja ndodhi në pjesën veriore të qytetit dhe, sipas burimeve paraprake, dyshohet se zjarri është i qëllimshëm. Persona ende të paidentifikuar kanë vënë flakën barërave në një zonë të ndjeshme, duke shkaktuar rrezik të menjëhershëm për banesat përreth.
Falë ndërhyrjes së shpejtë të forcave zjarrfikëse, zjarri është neutralizuar para se të përhapej më tej dhe të shkaktonte dëme materiale. Autoritetet lokale konfirmojnë se situata është aktualisht nën kontroll, por mbetet nën monitorim të vazhdueshëm për të parandaluar ndonjë riaktivizim të mundshëm të flakëve.
Policia dhe zjarrfikësit kanë nisur hetimet për të identifikuar autorët e mundshëm të kësaj zjarrvënieje të dyshuar, e cila mund të kishte pasoja të rënda për komunitetin.
Autoritetet u bëjnë thirrje qytetarëve të raportojnë çdo aktivitet të dyshimtë dhe të bashkëpunojnë për mbrojtjen e mjedisit dhe jetës në zonat e banuara