Pas skandalit të madh me Bankers Petroleum, vëmendja është kthyer fuqishëm te Albpetrol, kompania shtetërore që menaxhon pasuritë naftëmbajtëse të Shqipërisë. Burime të sigurta brenda sektorit të energjisë dhe industrisë së naftës kanë bërë me dije se Albpetrol po përballet me akuza të rënda për mungesë transparence dhe fshehje të informacionit ndaj mediave dhe publikut.
Në një kohë kur industria e naftës është në qendër të kritikave për abuzime dhe evazion fiskal, Albpetrol, si operatori shtetëror kryesor, dyshohet se po shmang raportimin e plotë dhe të qartë të veprimtarive të saj. Këto zhvillime kanë ngjallur shqetësime të thella lidhur me keqmenaxhimin e fondeve dhe mungesën e kontrollit mbi pasuritë natyrore.
Ekspertë dhe ish-punonjës të sektorit konfirmojnë se mungesa e transparencës në Albpetrol po thellon shqetësimet lidhur me menaxhimin dhe përfitimet që shteti duhet të marrë nga burimet energjetike.
Qëndrimet dhe reagimet zyrtare nga drejtuesit e Albpetrolit deri tani mungojnë, ndërsa qytetarët dhe media presin përgjigje konkrete mbi këto pretendime.
Situata e krijuar kërkon vëmendje të veçantë nga autoritetet shtetërore dhe organet e drejtësisë, në mënyrë që të sigurohet një menaxhim i drejtë, transparent dhe në shërbim të interesit publik të pasurive kombëtare.