Kredi me firmë false, “Raiffeisen Bank” kërkon paratë nga personi i gabuar – qytetari e nxjerr zbuluar me prova zyrtare
Një tjetër skandal financiar me kredi të marra me dokumente të falsifikuara është zbuluar së fundmi, këtë herë në qendër të akuzave është Raiffeisen Bank, e cila i ka kërkuar një qytetari të paguajë një kredi që nuk e ka marrë kurrë.
Sipas dokumenteve zyrtare dhe ekspertizës së policisë shkencore, bëhet fjalë për një kredi biznesi që është marrë nga një ortak i qytetarit K.Ç., pa dijeninë dhe pa firmën e tij. Së bashku me bashkëshorten, ata kanë provuar përmes disa analizave zyrtare se firmat e tyre ishin falsifikuar.
Skandali është bërë publik pasi banka, në vend që të kërkonte detyrimin nga kredimarrësi i vërtetë, i është drejtuar qytetarit të paditur për shlyerje të detyrimit, pavarësisht se ky i fundit nuk kishte asnjë lidhje me marrjen e kredisë.
Rasti lidhet me shoqërinë “S. P.” SHPK, themeluar në vitin 1994, ku shtetasi K.Ç. ishte një nga tre ortakët. Njëri prej tyre, duke shfrytëzuar të dhënat dhe firmat e falsifikuara, ka përfituar kredinë, e cila më vonë u kthye në një makth ligjor dhe financiar për një qytetar që nuk kishte asnjë faj.
Dy bashkëshortët fituan betejën ligjore ndaj bankës, duke e detyruar atë të tërhiqet pas provave të pakundërshtueshme, por rasti ngre alarmin për kontrollet dhe përgjegjësinë e bankave në verifikimin e dokumentacionit, sidomos në kreditë e biznesit.
Sa raste të tjera mund të fshihen pas mungesës së kontrollit? Shteti duhet të marrë masa për të parandaluar praktika të tilla abuzive, që vënë në rrezik të pafajshmit.