Procesi i rivlerësimit të votave nga Komisioni Qendror i Zgjedhjeve (KQZ) ka sjellë ndryshime të rëndësishme në rezultatin e zgjedhjeve të 11 majit në Qarkun e Tiranës. Deri më tani janë rinumëruar 1035 nga 1282 kuti votimi në total, që përbëjnë mbi 80% të të gjithë qarkut.
Nga ky proces ka rezultuar se Partisë Demokratike (PD) i ishin shtuar në mënyrë të padrejtë 567 vota, ndërsa Partisë Socialiste (PS) 356 vota. Gjithashtu, janë konstatuar shtesa të pajustifikuara edhe për disa parti të tjera më të vogla:
- Lëvizja Bashkë: +57 vota
- Koalicioni “Nisma – Shqipëria Bëhet”: +38 vota
- Partia Mundësia: +39 vota
- PSD: +32 vota
Ndërkohë, disa formacione të tjera politike kanë përfituar vota që më parë u ishin mohuar:
- Koalicioni Euroatlantik: +22 vota
- Koalicioni Djathtas për Zhvillim: +6 vota
Në të kundërt, Aleancës Kombëtare Shqiptare i janë zbritur 7 vota, ndërsa Aleanca Demokracia e Re ka përfituar 11 vota më shumë pas rivlerësimit.
Ky proces ka nxjerrë në pah parregullsi në numërim dhe ka sjellë ndryshime të drejtpërdrejta në tabelën përfundimtare të rezultateve, duke ngritur shqetësime për integritetin dhe saktësinë e administrimit të votës. KQZ pritet të përmbyllë numërimin e të gjitha kutive në ditët në vijim dhe të publikojë një raport të detajuar mbi devijimet e konstatuara.