Një tragjedi ka tronditur Kinën në orët e fundit, pasi një shpërthim në një fabrikë fishekzjarrësh në provincën jugore, Hunan vrau 9 persona dhe plagosi 26 të tjerë, sipas mediave shtetërore.
Aksidenti ndodhi në fabrikën Shanzhou Fireworks Co, pranë qytetit Changde, pak para orës 8:30 të mëngjesit, raporton agjencia shtetërore e lajmeve, Xinhua.
Shërbimet e emergjencës u mobilizuan menjëherë, me 28 cisterna uji dhe dy automjete kullimi që mbërritën në vendngjarje për të ndihmuar në operacionet e shpëtimit. Zjarrfikësit u përballën me kushte të pafavorshme, pasi kishte “rreziqe dytësore” në zonë dhe një rrezik në rritje të shpërthimeve të reja, gjë që e bëri punën e tyre dukshëm më të vështirë.
Qeveria provinciale e Hunanit ka ngritur tashmë një komitet të posaçëm hetimor për të gjetur shkakun e shpërthimit dhe për të mbajtur çdo person përgjegjës në përputhje me ligjin.
Incidenti tragjik i shtohet një liste të gjatë aksidentesh industriale që nxjerrin në pah problemet e vazhdueshme me standardet e sigurisë në vendet e punës në Kinë.
Vetëm muajin e kaluar, një shpërthim në një fabrikë kimike në Weifang, provinca Shandong, vrau 5 persona dhe plagosi 19 të tjerë. Ndërsa në prill, 22 persona humbën jetën në një zjarr në një restorant në qytetin verior kinez të Liaoyang.
