Guvernatori i Kalifornisë, Gavin Newsom, ka shpallur nisjen e procedurave ligjore kundër Presidentit Donald Trump, pas vendimit të këtij të fundit për të vendosur trupa të Gardës Kombëtare në Los Angeles pa miratimin e autoriteteve lokale. Masa është cilësuar nga Newsom si “e paligjshme, imorale dhe jokushtetuese”.
Në të njëjtën kohë, ushtria amerikane konfirmoi arrestimet e para brenda zonave ushtarake të ngritura përgjatë kufirit me Meksikën, si pjesë e fushatës së re të administratës Trump kundër emigracionit të paligjshëm. Zonat, të shtrira në një segment 418 kilometra nga New Mexico në Teksas, janë shpallur zyrtarisht zgjerime të bazave ushtarake nga Sekretari i Mbrojtjes, Pete Hegseth. Kjo u ka dhënë trupave kompetenca të përkohshme për të ndaluar migrantë dhe civilë të tjerë.
Vendimi i Trump për të ndërhyrë në Kaliforni ka shkaktuar protesta masive në Los Angeles, ku për tre ditë me radhë janë raportuar përplasje të dhunshme mes protestuesve dhe forcave të rendit, djegie automjetesh dhe hedhje objektesh ndaj policisë. Qendra e qytetit është shpallur zonë e paligjshme grumbullimi dhe qytetarët janë urdhëruar të shpërndahen.
Ndërsa Newsom paralajmëroi për pasoja ligjore ndaj Presidentit, Shtëpia e Bardhë reagoi menjëherë. Zëdhënësja Karoline Leavitt e akuzoi Guvernatorin për neglizhencë gjatë trazirave dhe e justifikoi ndërhyrjen me nevojën për të mbrojtur institucionet federale.
Presidenti Trump ka paralajmëruar masa të tjera të ashpra për kontrollin e kufirit dhe deportimin e emigrantëve, duke vendosur një objektiv ditor për ICE prej 3,000 arrestimesh. Situata në Kaliforni pritet të përshkallëzohet edhe më tej në përballjen e hapur midis shtetit federal dhe atij lokal.