Drejtoria Vendore e Policisë Fier njofton se specialistët e Sektorit të Qarkullimit Rrugor arrestuan në flagrancë shtetasin A. B., 28 vjeç, banues në Fier. Arrestimi u bë pasi mbrëmjen e djeshme, në fshatin Fermë Çlirim, automjeti që ai drejtonte u përplas me një mjet pune (frezë me rimorkio), me drejtues shtetasin G. Ç., 50 vjeç. Si pasojë e aksidentit u dëmtuan shtetasit G. Ç., A. Ç., 66 vjeç dhe një shtetas 14-vjeçar, që ndodheshin në rimorkion e frezës. Të dëmtuarit ndodhen në spital nën kujdesin e mjekëve.
Ndërkohë, specialistët për Hetimin e Krimeve të Komisariatit të Policisë Lushnjë ndaluan shtetasin M. Ç., 36 vjeç, nga Barbullinja e Lushnjës, i dyshuar për kryerjen e marrëdhënieve seksuale me dhunë ndaj një 24-vjeçareje disa muaj më parë.
Po ashtu, u referuan materialet në Prokurori për fillimin e procedimit penal ndaj katër shtetasve nga Fiershegani: I. M., 49 vjeç, F. M., 32 vjeç, I. M., 42 vjeç dhe E. M., 20 vjeç. Ata dyshohet se kanë ushtruar dhunë fizike ndaj një 65-vjeçari dhe kanë thyer xhamat e lokalit të tij për motive të dobëta.
Gjithashtu, janë referuar materialet për një ngjarje të ndodhur në ambulancën e lagjes Savër, ku shtetasja M. V., 78 vjeç, pas marrjes së një injeksioni, pësoi reaksion dhe ndërroi jetë në spitalin e Lushnjës. Po kryhen veprimet për përcaktimin e shkakut të vdekjes.
Materialet procedurale për të gjitha rastet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.