Procesi i numërimit të votave në qarkun e Fierit po vijon me ritme të qëndrueshme. Deri në këto momente janë numëruar 254 kuti nga 587 gjithsej, duke përfshirë një pjesë të konsiderueshme të zonave urbane dhe rurale.
Sipas rezultateve paraprake, Partia Socialiste kryeson ndjeshëm me një diferencë prej 25,694 votash më shumë në krahasim me koalicionin e udhëhequr nga Partia Demokratike. Ky avantazh e ka forcuar dukshëm pozicionin e PS-së në ndarjen e mandateve, ku aktualisht ka siguruar 12 mandate. Në anën tjetër, opozita ka arritur të sigurojë 4 mandate në këtë fazë të numërimit.
Fieri, një nga qarqet më të mëdha në vend për nga pesha elektorale, po shfaq një prirje të qartë në favor të mazhorancës aktuale. Në shumë qendra votimi, përparësia e PS-së është reflektuar në mënyrë të vazhdueshme, çka po ndikon drejtëpërdrejtë në përforcimin e mandateve.
Vëzhguesit politikë në terren raportojnë se procesi po zhvillohet në mënyrë të rregullt, me pjesëmarrjen e komisionerëve të të gjitha forcave politike dhe nën mbikëqyrjen e vëzhguesve të pavarur.
Me kutitë që mbeten ende për t’u numëruar, pritet të shihet nëse Partia Socialiste do të ruajë apo zgjerojë epërsinë, dhe nëse koalicioni opozitar do të arrijë të përmirësojë pozicionin e vet në ndarjen përfundimtare të mandateve.