Kryeministrja italiane, Georgia Meloni, do të udhëtojë në Shtetet e Bashkuara në ditët në vijim për të zhvilluar bisedime direkte me Presidentin amerikan, Donald Trump, për lehtësimin e tarifave që SHBA ka vendosur kundër Italisë. Ky udhëtim është i koordinuar me Bashkimin Evropian dhe është një hap i rëndësishëm në përpjekjet për të zgjidhur çështjet tregtare mes dy vendeve.
Meloni synon të kërkojë një ulje të tarifave, të cilat aktualisht janë 20% për të gjitha shtetet e BE-së, si dhe të propozojë një eliminim të tarifave reciproke në tregtinë dypalëshe mes SHBA-së dhe Bashkimit Evropian. Pritet që udhëtimi të ndodhë javën e ardhshme, megjithatë detajet e plota nuk janë finalizuar ende.
Gjithashtu, nënpresidenti amerikan, J. D. Vance, planifikon të vizitojë Romën gjatë periudhës së Pashkëve, ndonëse këto plane nuk janë konfirmuar ende. Ky zhvillim pason një qëndrim të ngjashëm nga Elon Musk, i cili shpreson për një zonë të tregtisë së lirë midis SHBA dhe Evropës me “zero tarifa”.