Qeveria hungareze ka njoftuar zyrtarisht se po tërhiqet nga Gjykata Ndërkombëtare Penale (ICC), duke u bërë vendi i parë i Bashkimit Evropian që ndërmerr një hap të tillë.
Vendimi vjen vetëm disa orë pasi kryeministri Viktor Orban priti në një vizitë shtetërore kryeministrin izraelit Benjamin Netanyahu, i cili aktualisht përballet me një urdhër-arresti të lëshuar nga ICC.
Orban kishte ftuar Netanyahun menjëherë pas lëshimit të urdhrit nëntorin e kaluar, duke deklaruar se ky vendim “nuk ka efekt ligjor në Hungari”. Gjatë një konference të përbashkët për shtyp, Orban u shpreh se Gjykata Ndërkombëtare Penale është shndërruar në një “gjyq politik” dhe se vendimi për të lëshuar një urdhër ndaj Netanyahut “e tregon qartë këtë gjë”.
Nga ana tjetër, Netanyahu e përshëndeti vendimin hungarez si një “hap të guximshëm dhe parimor”.
Në nëntor, gjyqtarët e ICC deklaruan se kishte “baza të arsyeshme” për të besuar se Netanyahu mbante “përgjegjësi penale” për krime të pretenduara lufte dhe krime kundër njerëzimit gjatë konfliktit mes Izraelit dhe Hamasit. Netanyahu e ka cilësuar vendimin e gjykatës si “antisemitik”.
Hungaria, një nga vendet themeluese të ICC-së me 125 shtete anëtare, tani bëhet anëtari i parë i BE-së që largohet nga kjo gjykatë. Megjithatë, tërheqja nuk ndikon në proceset gjyqësore ekzistuese në zhvillim.
