Kryeministri Edi Rama, gjatë takimit të dytë të nivelit të lartë “Shqipëria 2030 në BE – Rruga e Reformave”, ka theksuar edhe një herë rëndësinë e procesit të anëtarësimit në Bashkimin Evropian, duke theksuar se Shqipëria duhet të veprojë me shpejtësi për të përfituar nga ky moment historik.
Rama: Jemi pozicionuar mirë, por procesi është ende i brishtë
Në fjalën e tij, kreu i qeverisë u shpreh se Shqipëria ka bërë hapa të rëndësishëm në fusha kyçe si mirëqeverisja, lufta kundër korrupsionit dhe prokurimet publike, por theksoi se këto arritje janë ende të brishta dhe të kthyeshme.
“Kemi hapur dy grup kapitujsh dhe kemi ambicie të hapim të tjerë në vijim. Shqipëria është pozicionuar më mirë se kurrë më parë në renditjet evropiane për mirëqeverisjen dhe antikorrupsionin. Vetëm vitin e fundit, kemi përparuar me 18 vende në indeksin e Transparency International. Gjithashtu, vlerësimet ndërkombëtare na e kanë njohur Shqipërinë si vendin lider në rajon për prokurimet publike, menaxhimin e burimeve njerëzore dhe koordinimin e politikave,” – tha Rama.
“BE është domosdoshmëri, duhet të veprojmë shpejt”
Sipas Ramës, anëtarësimi në BE është një domosdoshmëri dhe Shqipëria nuk mund të humbasë kohë, pasi çdo vonesë mund të ndikojë në procesin e integrimit.
“Gjithçka që kemi arritur deri më tani është ende e brishtë dhe e kthyeshme. Prandaj, na duhet BE me çdo kusht dhe me çdo çmim. Dera e anëtarësimit është hapur me premisën që deri në fund të vitit 2027 ne mund të përmbyllim negociatat, por kjo derë mund të mbyllet nëse nuk jemi të shpejtë dhe të vendosur. Historia e zgjerimit tregon se fatet e vendeve që duan të hyjnë në BE nuk janë gjithmonë të sigurta. Për këtë arsye, duhet të ecim përpara me vendosmëri.”
Prioritetet e qeverisë për integrimin
Në fjalën e tij, Rama solli si shembull përparimin në fushën e prokurimeve publike, duke theksuar se Shqipëria nuk kënaqet me standardin minimal, por synon të shkojë përtej kërkesave bazë të BE-së.
“Ne kemi treguar se jemi shumë ambiciozë dhe nuk na mjafton të bëjmë minimumin e kërkuar. Kjo është arsyeja pse ne po ecim me ritme të shpejta në reforma dhe nuk do të ndalemi.”
Një mundësi historike për Shqipërinë
Rama theksoi se qeveria është e vendosur të vazhdojë përpjekjet për të përmbyllur negociatat brenda afateve të përcaktuara dhe për të siguruar një integrim të qëndrueshëm në BE. Ai nënvizoi se qeveria shqiptare mbetet e fokusuar në përmbushjen e reformave dhe forcimin e institucioneve, duke theksuar se ky proces është jetik për të ardhmen e vendit.
Anëtarësimi në BE është një nga objektivat kryesore të Shqipërisë dhe qeveria e ka shpallur këtë si një prioritet absolut.