Presidentja e Meksikës, Claudia Sheinbaum, njoftoi se të enjten do të zbulojë një plan të gjerë ekonomik si përgjigje ndaj tarifave të reja të presidentit amerikan, Donald Trump. Megjithatë, ajo nuk dha shumë detaje mbi masat konkrete që do të ndërmarrë qeveria meksikane.
“Ajo që do të shpallim është një program gjithëpërfshirës. Nuk bëhet fjalë për një kundërpërgjigje të drejtpërdrejtë me tarifa. Interesi ynë kryesor është forcimi i ekonomisë meksikane, veçanërisht i industrisë së automobilave,” tha Sheinbaum.
Ajo përmendi përpjekjet e ish-presidentes braziliane Dilma Rousseff për të forcuar industrinë automobilistike të Brazilit dhe tha se administrata e saj po shqyrton një qasje të ngjashme.
“Ne po importojmë shumë automjete. Nëse duam të forcojmë industrinë tonë, duhet të sigurojmë që makinat që blihen në Meksikë të prodhohen në Meksikë,” shtoi Sheinbaum.
Presidentja meksikane theksoi se programi që do të prezantojë nuk do të kufizohet vetëm në reagimin ndaj tarifave të SHBA-së, por do të përfshijë masa më të gjera për të rritur pavarësinë ekonomike të vendit.