Një tërmet i fuqishëm me magnitudë 7.7 ballë goditi Myanmarin, duke shkaktuar pasgoditje dhe lëkundje të ndjeshme edhe në Tajlandë. Si pasojë, mijëra qytetarë në Bangkok u evakuuan nga ndërtesat, duke ngritur shqetësime mbi sigurinë e infrastrukturës.
Në një reagim zyrtar, kryeministrja tajlandeze Paetongtarn Shinawatra deklaroi se çarjet që shkaktuan evakuimet ishin paraekzistuese dhe nuk kishin lidhje direkte me tërmetin.
“Vendimi për evakuimin e çdo ndërtese është në diskrecionin e organizatave përkatëse. Megjithatë, ne kërkojmë që çdo vendim i tillë të komunikohet qartë dhe të bazohet në informacione të verifikuara nga burime zyrtare të qeverisë,” tha ajo.
Shinawatra u bëri thirrje pronarëve të ndërtesave që të kryejnë inspektime të menjëhershme, për të përcaktuar nëse çarjet e vërejtura ishin të vjetra apo të reja.
Ndërkohë, pasgoditje të forta janë raportuar në Myanmar, por sipas shkencëtarëve të qeverisë tajlandeze, ato nuk përbëjnë rrezik për Tajlandën.
Deri më tani, raportimet zyrtare konfirmojnë të paktën 1,700 viktima nga tërmeti në Myanmar dhe zonat përreth. Autoritetet vijojnë përpjekjet për ndihmë dhe vlerësimin e dëmeve.